OOS-KAAP. – Twee liggame is Woensdagoggend omstreeks 07:00 voor in ‘n voertuig in Quigney in Oos-Londen gevind. ‘n Munisipale wetstoepasser (30) is op aanklagte van moord en poging tot moord in hegtenis geneem.
Lt.kol. Siphokazi Mawisa sê die polisie was van die liggame in ‘n Nissan Almeira langs ‘n hotel ingelig. Met aankoms is een liggaam in die passasiersitplek en een in die bestuurdersitplek met skietwonde aangetref. Beide was reeds oorlede.
‘n Derde slagoffer is geskiet en gewond in ‘n hotelkamer wat bespreek was gevind en is vir mediese behandeling na ‘n hospitaal geneem.
Woensdagmiddag laat is ‘n persoon na Oos-Londen-polisiestasie om ‘n bedrogsaak oop te maak. Hy het inligting van die insident in Quigney verskaf. Polisielede het dit verdag gevind, ondersoek ingestel en dadelik die persoon as verdagte, wat op die misdaadtoneel geplaas is, in hegtenis geneem.
Die verdagte sal Maandag op twee aanklagte van moord en een van poging tot moord in die Oos-Londen-landdroshof verskyn.
