GAUTENG. – Die Lughawemaatskappy van Suid-Afrika (Acsa) het Donderdag aangekondig dat dit ’n landwye onderhoud-en-uitbreidingsprogram aan infrastruktuur oor al nege van sy lughawens loods. Die doel is om operasionele doeltreffendheid, passasierservaring en langtermyn groei te verbeter.
Luidens ‘n uitgereikte verklaring is daar by O.R. Tambo Internasionale Lughawe (Ortia) reeds opgraderings aan ablusiegeriewe aan die gang wat teen Desember voltooi sal wees. Ander belangrike projekte sluit nuwe straalbrandstoflyne, vervanging van kragopwekkers en passasierslaaibrûe, asook opgraderings aan hysbakke, roltrappe en landings- en weerstelsels in. Acsa werk saam met die regering en ander rolspelers om die projekte met minimale ontwrigting te voltooi.
Mpumi Mpofu, Acsa se uitvoerende hoof, sê projekte word tussen laat 2025 en 2027 beplan: “Hierdie program dui op Acsa se herstel ná Covid-19 en ons vermoë om in kritieke infrastruktuur te belê.”
Lees die volledige verklaring hier.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
