LIMPOPO. – ‘n Ma (31) en haar baba (1 maand) is Vrydag in hulle huis met ‘n skerp voorwerp doodgesteek. Kagiso Thabang Terry Thubane (29), die ma se broer, het in die hof verskyn.
Brig. Hlulani Mashaba sê die dubbelmoord het omstreeks 15:30 in die Nelgra-seksie gebeur. Die verdagte het glo ná die moorde die moordhuis se vensters toegemaak en die deure gesluit, waarna hy gevlug het.
Die vermoorde ma se suster het op hulle liggame afgekom en die polisie ontbied. Twee sake van moord is geopen en die verdagte is gesoek totdat hy hy Saterdag langs die R40 tussen Phalaborwa en Mica in hegtenis geneem is. Die motief vir die moorde is deel van die ondersoek.
Thubane het Maandag op die aanklag van moord in die Phalaborwa-landdroshof verskyn. Die saak is vir verdere ondersoek tot 2 Mei uitgestel. Hy bly in aanhouding.
