MPUMALANGA. – ‘n Vrou (33) is in hegtenis geneem na haar baba Maandag in wat as verdagte omstandighede deur die polisie beskryf is in Boikhutso Trust buite Bosbokrand gesterf het.
Kol. Donald Mdhluli sê voorlopige ondersoek dui aan die baba het moontlik weens vergiftiging gesterf. Die insident is deur ‘n plaaslike begrafnisondernemer onder die polisie se aandag gebring. Die polisie het die baba dood op die toneel in die teenwoordigheid van die ma aangetref. Ondersoek na die omstandighede en oorsaak van die baba se dood is reeds aan die gang.
Die motief vir die insident is onbekend.
Mdhluli sê die ma sal binnekort in die Bosbokrand-landdroshof voorkom.
Dr. Zeph Mkhwanazi, die waarnemende provinsiale kommissaris van die provinsie, het die beweerde moord op die kind veroordeel en gevra frustrasies moenie op onskuldige kinders uitgehaal word nie: “Die wet behoort sekerlik beslissend te handel met enige persoon wat kinders skade aandoen, ongeag enige verskoning waaraan mens mag dink. Ons rol is om die kwesbares te beskerm, insluitend kinders.”
