LIMPOPO. – Ntanganedzeni Siphugu (27) het vlugtig op twee aanklagte van moord in die Tshilwavhusiku-landdroshof verskyn. Sy het vermoedelik vir haar kinders gif ingegee.
Mashudu Malabi, NVG-woordvoerder, sê die saak hou verband met ’n voorval op 1 Junie in Madabani, waar sy na bewering ’n giftige middel aan haar twee minderjarige kinders, van ses en nege jaar oud, toegedien het. Daar word beweer dat albei kinders die volgende dag siek geword het. Een van hulle is na ’n kliniek gehaas waar hy dood verklaar is, terwyl die tweede kind later by die huis oorlede is. Die polisie het die ma ná ’n ondersoek in hegtenis geneem. Sy staan nou op twee aanklagte van moord tereg.
Die saak is vir ‘n formele borgtogaansoek tot 12 Junie uitgestel. Siphugu bly intussen in aanhouding.
