WES-KAAP. – ‘n Ma (23) is op aanklag van moord in hegtenis geneem nadat die liggaam van haar babadogter, sowat drie dae oud, langs ‘n hoofweg gevind is.
Sers. Christopher Spies sê die polisie is op Maandag 19 Augustus omstreeks 11:00 na die toneel oorkant Kwanokuthla ontbied, waar die babameisie deur mediese personeel dood verklaar is.
“Ondersoek het die polisie na ‘n nabygeleë hospitaal geneem waar ‘n vrou vroeër vandeesmaand aan die baba geboorte geskenk het. Die vrou is in Kwanokuthula opgespoor en op ‘n aanklag van moord in hegtenis geneem.”
Die ma, wat in aanhouding is, sal vandag vir die eerste keer in die Plettenbergbaai-landdroshof verskyn.
Spies sê die ondersoek duur voort.
