VRYSTAAT. – Die ma (25) van ’n twee dae oue baba wat Vrydag (12 Desember) in Brandfort verlate onder ‘n boom gevind is, is deur die Brandfort-eenheid vir gesinsgeweld, kinderbeskerming en seksuele misdrywe opgespoor en in hegtenis geneem. Sy word van poging tot moord aangekla.
Luidens ‘n verklaring van sers. Mahlomola Kareli is die baba omstreeks 15:00 naby ’n staproete op die R30, Theunissen, ontdek. ‘n Man en sy neef het die baba onder ‘n boom gekry, nadat ‘n onbekende man hulle aandag op die baba gevestig het. Die goeie Samaritane het die baba na hulle huis geneem en onmiddellik die polisie en nooddienste ontbied. Die baba is daarna vir mediese ondersoek en versorging na ’n plaaslike hospitaal geneem.
Die ma sal binnekort op die aanklag van poging tot moord in die Theunissen-landdroshof verskyn.
