KATHU, NOORD-KAAP. – ’n Mak varkie is Vrydag in Kathu se strate deur Rhino-sekuriteitsdienste gevind.
Hy het na bewering in die strate rondgehardloop en inwoners het Rhino ontbied. Met hulle aankoms in die gebied kon hy met gemak gevang word.
Bewys van eienaarskap is verlang om die varkie terug te kry.
Een sosialemediagebruiker het opgemerk dat “Kathu nou regtig ’n plaas word”. Ander het voorgestel dat Varkie sommer geslag moes word.
Volgens Rhino het die dier nie wild te kere gegaan toe hy gevang is nie, en sy relatiewe mak geaardheid laat hulle vermoed dat dit ’n varkie is wat by iemand se huis as ’n troeteldier aangehou word.
Dit is nie duidelik of die eienaar van die varkie hom al opgeëis het nie.
Bronne: Rhino-sekuriteitsdienste, Facebook
