KWAZULU-NATAL. – ‘n Man (21) is Sondagoggend in Mhlasini waar hy gewoon het, dood in ‘n plas bloed aangetref.
Reaction Unit South Africa (Rusa) sê die diens is deur ‘n verbyganger na die toneel ontbied waar die lewelose man met ‘n bloeiende steekwond in die nek aangetref is. Hy is op die toneel dood verklaar.
‘n Familielid het reaksiebeamptes ingelig die oorledene het hom kort voor sy moord besoek. Hy het ‘n besering aan sy gesig gehad. Volgens sy verduideliking het hy die besering die vorige aand tydens ‘n struweling met ‘n onbekende persoon opgedoen.
Rusa sê dit kan nie bevestig word of die struweling met die persoon tot die oorledene se moord gelei het nie.
Nuusflits het polisiekommentaar gevra.
