VSA. – Volgens die United States Secret Service is ’n onbekende man doodgeskiet nadat hy die beveiligde omtrek van president Donald Trump se Mar-a-Lago-woning in Palm Beach betree het.
Beamptes sê die verdagte was ’n wit man in sy twintigs. Hy het ’n haelgeweer en ’n brandstofkan by hom gehad en is naby die noordelike hek van die landgoed opgemerk. Die voorval het vanoggend (Sondag) plaasgevind.
Volgens BBC News het amptenare bevestig dat die Amerikaanse Federale Speurdiens (FBI) die ondersoek bystaan en bewyse versamel. President Trump was nie ten tyde van die voorval in Florida nie.
Die terrein word streng bewaak, selfs wanneer Trump nie daar is nie. Dit kan verklaar waarom die gewapende man vinnig gestuit is voordat hy verder op die eiendom kon beweeg.
Die moontlike motief vir die verdagte se optrede bly onbekend en vorm deel van die ondersoek. Volgens berigte sal die voorval waarskynlik kommer oor politieke geweld in die VSA aanwakker, veral ná vorige insidente, insluitend twee aanslae op Trump se lewe en die skietvoorval waarin die regse politieke aktivis, Charlie Kirk, dood is.
Lees ook: Trump-bondgenoot doodgeskiet terwyl hy oor vuurwapengeweld praat
https://nuusflits.com/trump-bondgenoot-doodgeskiet-terwyl-hy-oor-vuurwapengeweld-praat/
Bron: BBC News, NBC News
Fotokrediet: BBC News
