LIMPOPO. – ‘n Man (46) is Maandagaand doodgeskiet toe die polisie op ‘n klagte van huishoudelike geweld reageer het.
Brig. Hlulani Mashaba sê polisielede is omstreeks 23:30 na die adres in Ga Nchechane-woonbuurt ontbied. Op die toneel het hulle die man, wat vyandig was, teëgekom. Hy was met ‘n lem en hamer gewapen. Die polisielede het die situasie probeer kalmeer toe die man hulle glo aangeval het.
‘n Polisielid het verskeie ernstige beserings opgedoen. Terwyl die lid op die grond gelê het, het die man hom na bewering bly aanval en hom ontwapen. Nog ‘n polisielid het die gevaar neutraliseer en die man noodlottig gewond. Die polisielid moes mediese behandeling ontvang.
Opod is in kennis gestel en ‘n ondersoek is onderweg.
Die Mankweng-polisie het sake van geregtelike doodsondersoek en poging tot moord geopen.
