LIMPOPO. – ‘n Man het na bewering Saterdag sy vrou (45) omstreeks 18:00 by ‘n kerkdiens in Makonde Shadani-woonbuurt doodgeskiet. Die Thohoyandou-polisie is op soek na die man.
Kol. Malesela Ledwaba sê die kerkdiens was reeds aan die gang toe die verdagte na bewering die gebou binnegaan en verskeie skote op die oorledene geskiet het. Sy het op die toneel gesterf.
Die verdagte het in ‘n silwergryskleurige Toyota Corolla van die toneel gevlug.
Die motief vir die insident is onbekend, maar Ledwaba sê huishoudelike geweld kan nie uitgesluit word nie.
Enigiemand wat weet waar die verdagte hom bevind, ka sers. Mashamba Mbangiseni by 079 424 3573 bel.
