VRYSTAAT – ’n Man (57) is dood en sy 61-jarige vrou ernstig getraumatiseer ná ’n gewelddadige plaasaanval op die plaas Môrelig buite Parys, omstreeks middernag op 10 Januarie.
Volgens kapt. Loraine Earle, polisiewoordvoerder, het die egpaar na bewering geslaap toe twee mans in oorpakke hul woning binnegedring en hulle oorval het. Die aanvallers het die sleutels van die gesin se Mahindra-dubbelkajuitbakkie geëis. Die man is brutaal met ’n onbekende voorwerp aangerand, selfs nadat hy gesê het die sleutels is op ‘n ander eiendom op die plaas gelos.
Terwyl een verdagte na die ander eiendom is om die sleutels te kry, is die vrou met kabelbinders vasgemaak en ook aangerand, hoewel sy geen sigbare beserings opgedoen het nie. Toe die tweede aanvaller met die sleutels terugkeer, het die mishandeling voortgeduur. Die mans het met die gesteelde bakkie en die vrou se selfoon gevlug.
Die vrou is na ’n nabygeleë plaas om hulp te kry, waarna alle nooddiens- en wetstoepassingsagentskappe ingeroep is. Die bakkie is later verlate in Tumahole gevind. Die vrou ontvang tans traumaberading.
Die polisie ondersoek ’n saak van huisroof en moord. Enigiemand met inligting wat tot ’n inhegtenisneming kan lei, word versoek om adjunk-offisier Brian Janse van Rensburg by 082 466 8094 te skakel.
