VRYSTAAT. – Kenneth Lepota (36) van QwaQwa wat byna vir 12 jaar lank op die vlug was nadat hy aan verkragting skuldig bevind is, is uiteindelik weer in hegtenis geneem en sal vandeesweek vir vonnisoplegging in die hof verskyn.
AO Mmako Mophiring, polisiewoordvoerder, sê Lepota is in 2014 saam met twee ander mans aan die verkragting van ‘n 26-jarige vrou skuldig bevind. Hy het egter nooit vir sy vonnisoplegging opgedaag nie en het sedertdien spoorloos verdwyn. Die verkragting het in die vroeë oggendure van 6 April 2011 plaasgevind. Die vrou en ‘n vriendin was op pad huis toe vanaf ‘n taverne toe drie mans hulle gekonfronteer het. Die slagoffer is met geweld na ‘n nabygeleë bosgebied gesleep waar sy verkrag is. Sy kon al drie aanvallers later uitken. Al drie mans is in hegtenis geneem en uiteindelik in die Tseseng-landdroshof skuldig bevind. Hulle is op borgtog vrygelaat totdat vonnis opgelê sou word.
Een van die beskuldigdes is egter oorlede voordat die hof hom kon vonnis, terwyl ‘n tweede beskuldigde, Morena Mokoena, later lewenslange gevangenisstraf opgelê is. Lepota het intussen verdwyn en die polisie kon hom vir byna 12 jaar nie opspoor nie. Die deurbraak het Vrydag gekom toe ‘n gemeenskapslid Lepota in Tseseng herken het, nadat hy na die gebied teruggekeer het. Die persoon het die ondersoekbeampte in kennis gestel, waarna die polisie hom onmiddellik in hegtenis geneem het.
Lepota sal na verwagting Dinsdag 7 Julie in die Tseseng-landdroshof verskyn waar die hof uiteindelik ‘n vonnis teen hom sal oplê.
