WES-KAAP. – Leboneng Molele het in die Kaapstadse landdroshof verskyn in verband met vier moordaanklagte, nadat vier liggame wat onherkenbaar verbrand is, onlangs in Dunoon gevind is.
Eric Ntabazalila, NVG-woordvoerder, sê die saak is uitgestel vir verdere inligting oor borgtog en om ’n Sesotho-tolk te bekom. Die vier liggame is in Augustus in die Dunoon-gebied gevind nadat ’n motoris volgens DA-parlementslid Ian Cameron na bewering gesien het hoe mense vasgebind en aangerand word voordat hulle in die rigting van ’n vuur gedwing is.
Volgens Cameron het die motoris 10111 gebel om die voorval aan te meld, maar die oproep is na bewering beëindig nadat die operateur op ’n presiese adres aangedring het. Cameron het gesê die oproep is later hersien en dat die hantering daarvan as onaanvaarbaar beskou is. Hy het ook gesê dissiplinêre stappe is glo begin.
Die saak duur voort.
