WES-KAAP. – Fabian Mertenton (38) is Donderdag deur die Plettenbergbaai-landdroshof tot 10 jaar tronkstraf vir sy betrokkenheid by geteikende afpersing in die Mosselbaai- en George-konstruksiebedryf gevonnis. Polisiebestuur het die ondersoek-en-vervolgingspan vir die suksesvolle vervolging geprys.
Sers. Christopher Spies, polisiewoordvoerder, sê in ‘n verklaring polisiebeamptes van die George-polisiekantoor het opgetree nadat ‘n sakeman in die konstruksiesektor gedreig is. ’n Span bestaande uit verskeie eenhede is saamgestel en ’n lokvaloperasie is uitgevoer. Lede het op ’n huis in Plattner-boulevard, George, toegeslaan waar vyf mans en een vrou aangetref is. ’n Groot hoeveelheid kontant is in besit van die man gevind en die groep is in hegtenis geneem.
Die provinsiale eenheid vir georganiseerde misdaadondersoeke het ná verdere ondersoek die misdaadplan onthul toe e-posse en WhatsApp-boodskappe bekom is. Mertenton is vir afpersing aangekla, terwyl die ander verdagtes wat saam met hom in hegtenis geneem, vrygelaat is.
Die saak is Donderdag afgehandel toe Metenton tot tien jaar tronkstraf gevonnis is, waarvan vyf jaar vir vyf jaar opgeskort is.
“Hierdie skuldigbevinding en vonnis moet dien as ’n afskrikmiddel vir dié wat soortgelyke misdade wil pleeg. Afpersers wat die konstruksiesektor of enige ander besigheid teiken, bedreig die ekonomie van hierdie streek. Die polisie sal toesien dat geen moeite ontsien word om sulke misdadigers vas te trek sodra hulle aangemeld word nie,” het (adv.) lt.genl. Thembisile Patekile afgesluit.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
