MPUMALANGA. – ‘n Man (26) het Vrydag in die Chief Albert Luthuli-landdroshof verskyn nadat hy glo ‘n kleutermeisie (2) in ‘n ou verlate huis in Nhlazatshe, naby Elukwatini, ingelok en verkrag het.
Lt. kol. Jabu Ndubane sê die kleuter was glo onderweg snoepwinkel toe, toe die misdaad gepleeg is. Volgens inligting het die kleuter se ouma gehoor hoe ‘n verbyganger sê ‘n kind is beseer en sy bloei. Die man is vroeër in die teenwoordigheid van die kleuter onderweg na waar die misdaad plaasgevind het, gesien.
Hy is deur die gemeenskap gesoek en aangekeer waar hy gesit en drink het. Hy het blykbaar beserings opgedoen toe hy aangekeer is. Die polisie is ontbied en hy is op aanklag van verkragting gearresteer.
Die saak is tot 12 Februarie uitgestel, terwyl die verdagte in aanhouding bly.
