KWAZULU-NATAL. – Jonathan Bradfield, ’n matrikulant van Hoër Landbouskool Marlow op Cradock, is dood nadat hy Donderdag 1 Oktober in die branders vermis geraak het terwyl hy by Mtunzini se hoofstrand in KwaZulu-Natal geswem het.
Die Marlow-gemeenskap het Vrydag in ’n huldeblyk aan Bradfield afskeid geneem van die jong man wat vanjaar ’n matriekleerling was.
Bradfield het volgens die skool se huldeblyk ’n besondere plek in die Marlow-gemeenskap gehad en sal deur personeel, klasmaats en vriende onthou word. Vriende het herinneringe aan sy vriendelikheid en mooi gees gedeel.
Die 19-jarige Bradfield het volgens die Nasionale Seereddingsinstituut (NSRI) Donderdagmiddag by Mtunzini se hoofstrand gaan swem. Hy was saam met sy meisie in die water toe hy volgens die NSRI in die moeilikheid geraak het.
Sy meisie het daarin geslaag om uit die water te kom, waarna sy opgemerk het dat Bradfield vermoedelik deur ’n sterk stroom meegesleur is en in die branders verdwyn het.
Die NSRI-Richardsbaai, die KZN-branderreddingsnetwerk, SAPD, Ezemvelo KZN Wildlife, IPSS Medical Rescue en lede van die gemeenskap het aan die soektog deelgeneem. ’n Hommeltuig, reddingsboot en jetski is ook gebruik.
Die NSRI het aanvanklik berig dat uitgebreide lug-, see- en kuslynsoektogte geen teken van Bradfield opgelewer het nie. Die skool se daaropvolgende huldeblyk het sy dood bevestig.
Die skool het sy medelye met Bradfield se familie, vriende, klasmaats en personeel uitgespreek.
Bron: Hoër Landbouskool Marlow; NSRI; Algoa FM
