VRYSTAAT. – Chandré van Zyl in gr. 12 van die C&N Sekondêre Meisieskool Oranje het Vrydag ‘n teddiebeer aan Estelle van Rooyen, haar “plankie”, oorhandig. Dis egter nie net ‘n gewone teddiebeer nie.
In ‘n sosialemediaplasing word gesê die teddiebeer, geklee in ‘n pampoenrok, is deel van ‘n 12-jaar-lange tradisie wat tussen matrieks en hulle plankies bestaan. Die opdrag tydens die oorhandiging was duidelik: die tradisie moet voortleef.
Estelle sal die teddiebeer oor vier jaar weer aan haar plankie oorhandig.
Michelle Britz het in 2013 die tradisie begin en ‘n teddiebeer aan Simoné Coetzee gegee en gesê: “Hierdie is joune, maar gee dit oor 4 jaar vir jou plankie.” Simoné het die teddiebeer in 2017 aan Karlien du Plessis gegee. In 2021 het Chandré van Zyl die beertjie van Karlien gekry en Chandré het dit nou aan Estelle gegee.
