GAUTENG. – Beamptes van die Johannesburg-metropolisie (JMPD) se taktiese reaksie-eenheid het tydens roetinepatrollie meer as 4 000 vermoedelik gesteelde SIM-kaarte teruggevind en vier verdagtes in hegtenis geneem.
JMPD sê in ‘n sosialemediaplasing die voorval het Dinsdag omstreeks 20:00 op die M1 Suid naby die Xavierstraat-afrit plaasgevind. JMPD-beamptes het ’n wit BMW 1-reeks sonder nommerplate opgemerk. Die voertuig is gestop en deursoek. ‘n Plastieksak met meer as 4 000 MTN-SIM-kaarte is in die sak gekry, saam met ’n toestel wat vermoedelik ’n seinblokkeerder of ’n SIM-registrasietoestel was. Daar is ook bevind dat die voertuig ’n vals tydelike permit gebruik het.
Die vier verdagtes is in hegtenis geneem en ’n saak is by die polisie geopen. Alle items is as bewyse aan die Booysens-polisie oorhandig. Die voertuig is vir verdere ondersoek by die Lenasia-polisie se voertuigskut ingeboek.
