NOORDWES. – James Neo Tshoaeli, oftewel Tiger, die beweerde meesterbrein van die onwettige myners van skag 11 van die myn by Stilfontein, wat verlede week na bogronds teruggekeer het, word gesoek.
Brig. Athlenda Mathe sê maksimum hulpmiddele is deur die polisie geloods om die voortvlugtende verdagte, ‘n Lesotho-burger, wat as gevaarlik beskou word, op te spoor.
Mathe sê maj. genl. Patrick Asaneng, Noordwes se waarnemende provinsiale kommissaris, sê koppe sal rol as die beamptes wat die beweerde baasbrein tussen skag 11 en Stilfontein-polisie-aanhoudingselle help ontsnap het, gevind word. Die verdagte is ook nie by ‘n ander polisiestasie, waar van die onwettige myners aangehou word, ingeboek nie. Hy is ook nie vir mediese sorg opgeneem nie.
Volgens Mathe word daar in verskeie verklarings na Tshoaeli as die ringkop, wat ondergrondse operasies bedryf het, verwys.
“Hy word ook deur sommige onwettige mynwerkers na bewering verantwoordelik vir sommige sterftes, aanranding en marteling wat plaasgevind het, beskuldig, volgens video’s in polisiebesit. Daar word ook beweer dat hy kos opgegaar en weggehou het van ander onwettige mynwerkers. Asaneng het teleurstelling uitgespreek in wat hy as ‘n verleentheid beskou vir die Vala Umgodi-operasie wat vanaf Desember 2023 aan die gang is. Hy het belowe om te verseker dat diegene wat verantwoordelik is vir hierdie ontsnapping uit aanhouding voor die hof gebring word en dat “Tiger” gevind word.”
Enigiemand met relevante inligting word gevra om na vore te kom.
