Die MK-party het op 22 Julie ’n mosie van wantroue teen president Cyril Ramaphosa by die nasionale vergadering ingedien.
In ’n brief gerig aan Thoko Didiza, die speaker van die nasionale vergadering, het dr. Mandlakayise John Hlophe, parlementêre leier van die uMkhonto weSizweparty, bevestig dat die mosie ingevolge Artikel 102(2) van die Grondwet en Reël 129 van die nasionale vergadering ingedien is. “Die redes vir hierdie mosie vereis die dringende byeenroeping van ’n spesiale sitting om die mosie te bespreek en daaroor te stem,” het Hlophe geskryf.
Die voorgestelde resolusie lys verskeie redes vir die gebrek aan vertroue in Ramaphosa se leierskap:
- Regeringsversaking: Hoë vlakke van misdaad en wetteloosheid, verswakte polisiediens en bewerings van politieke inmenging in wetstoepassingsliggame.
- Ekonomiese wanbestuur: Hoë werkloosheidsyfers sonder effektiewe herstelplanne en onvermoë om ekonomiese groei te bewerkstellig.
- Leierskapsonstabiliteit: Onvermoë om die land effektief te bestuur en om ’n positiewe koers te handhaaf.
- Nasionale veiligheidskwessies: Versuim om grense te beveilig en georganiseerde misdaad te bekamp.
- Rekenpligtigheid en deursigtigheid: Gebrek aan openheid oor veldtogfondse en gebrekkige optrede teen korrupsie.
Die dokument sluit af dat die mosie nie polities gemotiveer is nie, maar bedoel is om verdere verval te voorkom en openbare vertroue in bestuur te herstel. Die party doen ’n beroep dat die mosie binne twee weke ná indiening in die nasionale vergadering bespreek en voor gestem word.
Lees die volledige dokumente hier onder:
