KWAZULU-NATAL. – Lt.genl. Nhlanhla Mkhwanazi sê: “Dankie Nasionale Kommissaris, vir die vertroue. Dit was nie ’n maklike besluit vir my nie, aangesien ek met my familie ooreengekom het dat ek slegs een termyn sou dien. Die plan was om vanaf 1 April met vakansie te gaan, maar toe die nasionale kommissaris die belangrikheid van diens aan die mense van Suid-Afrika, veral die inwoners van KwaZulu-Natal, beklemtoon het, het ek heroorweeg en myself beskikbaar gestel om die nasie te dien. Van my kollegas verwag ek niks minder as volle samewerking en ondersteuning nie. Die doelwitte bly dieselfde: om misdaad te verminder, ’n skoon oudit te behaal en te verseker dat ons kliënte tevrede is met die diens wat ons aan hulle lewer.”
Genl. Fannie Masemola, die nasionale polisiekommissaris, het Sondag KZN se provinsiale polisiebestuur in duidelike terme aangespreek ná die heraanstelling van Mkhwanazi vir nog vyf jaar as provinsiale kommissaris. Hy het eers die premier, Thami Ntuli, ontmoet om die aanstelling formeel te maak en toe met die polisiebestuur. Masemola het beklemtoon dat alle onsekerheid en bespiegeling nou iets van die verlede is en dat die fokus vorentoe op samewerking en dienslewering moet wees. “Ek is hier om formeel aan julle bekend te maak dat ek nog vyf jaar aan lt.genl. Mkhwanazi gegee het om voort te gaan om polisiëring in hierdie provinsie te lei. Ek sien uit na die uitstekende spanwerk wat julle oor die afgelope vyf jaar getoon het. Julle moet lt.genl. Mkhwanazi ondersteun en die enigste manier waarop julle dit kan doen, is deur opdragte uit te voer en julle werk te doen.”
Volgens kol. Robert Netshiunda het Masemola aan die senior offisiere wat teenwoordig was, gesê hul plig is om Mkhwanazi te ondersteun deur dissipline en die uitvoering van opdragte en om hulle werk te doen om stabiliteit in die provinsie te verseker. Hy het verder streng gewaarsku dat polisiëring nie sonder die gemeenskap kan plaasvind nie. Volgens Masemola moet gemeenskappe aktief by strategieë betrek word en moet hulle ’n rol speel in die bekamping van misdaad. Hy het gesê inwoners – beide misdadigers en wetsgehoorsame burgers – moet die polisie se teenwoordigheid voel, en dat die enigste prioriteit nou is om misdaadvlakke te verlaag en veiligheid te verbeter. Masemola het verder beklemtoon dat, met die leierskap nou finaal bevestig, is daar geen verskoning meer vir verdeeldheid of traagheid nie en dat samewerking binne die geledere noodsaaklik is om resultate te lewer.
Mkhwanazi is duidelik die land se gunstelingpolisiebeampte, gesien uit reaksie op die vorige berig van Nuusflits oor die heraanstelling.
