KIMBERLEY. – Clayton Monroe Lee (41) is in die Hooggeregshof in Kimberley altesaam 22 jaar tronkstraf vir moord en twee klagtes van aanranding opgelê.
Lee gaan 22 jaar vir die moord op Mitashja Estelle Lee, drie jaar vir die ernstige aanranding van Avery Lee en een jaar vir die aanranding van Monqiue Lee gelyktydig uitdien.
Gewelddadige familiemoord gaan regter se verstand te bowe
Regter Bulelwa Pakati het gesê sy is stomgeslaan dat ’n man die ma van sy kinders, voor een van die kinders, 23 keer met ’n visvangmes kon steek. Hy het ook vir Avery, sy kleindogter, ernstig beseer wat veroorsaak het dat sy baie bloed verloor het. Volgens haar was dit duidelik dat die beskuldigde vasbeslote was om die moord uit te voer.
Familie onder emosionele druk
Luidens ’n impakstudieverslag, wat deur ’n maatskaplike werker uitgereik is, het die voorval die familie onder geweldige emosionele en finansiële druk geplaas. Die studie het aangedui dat Monique nog nie haar pa vir die moord kon vergewe nie. Desmoney Lee, die middelste dogter, praat wel met die beskuldigde. Luidens die maatskaplike verslag sê Avery “Oupa my seer” wanneer sy na haar ou wonde verwys.
“Geen vonnis sal die moederliefde wat die oorledene se dogters verdien, kan terugbring nie,” het Pakati gesê.
