KWAZULU-NATAL. – ‘n Motorfietsbestuurder het Maandagaand gesterf toe hy op die R102 in die gebied van Canelands, na bewering teen die verkeersvloei gery en met ‘n ligte afleweringsvoertuig gebots het. Die bestuurder van die bakkie is ernstig beseer.
Reaction Unit South Africa (Rusa) sê in ‘n sosialemediaplasing ‘n ooggetuie het die ongeluk ongeveer 20:30 by die operasionele sentrum aangemeld. Met aankoms op die toneel was privaat abulansdienste reeds besig om die ernstig beseerde bestuurder van ‘n wit Kia Picanto te stabiliseer. Die motorfietsbestuurder het op die toneel aan sy beserings gesterf. Sy motorfiets is aan die kant van die pad in ‘n bos aangetref.
“Daar is beweer dat die motorfietsryer teen die vloei van verkeer in die suidwaartse baan gery het toe hy met die aankomende voertuig gebots het. Die Kia Picanto het tydens impak omgeslaan.”
Rusa sê die identiteit van die oorledene was teen Maandagaand nog nie vasgestel nie.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
