GAUTENG. – Karlu van Aswegen, in gr. 3 in Laerskool Magalieskruin in Pretoria, het Maandagaand in ‘n motorongeluk gesterf. Karin, Karlu se ma, het gisteraand in die hospitaal aan beserings wat sy in die ongeluk opgedoen het, gesterf.
Karlu en Karin se afsterwe is deur Laerskool Magalieskruin op sosiale media bekendgemaak. Die skool het Dinsdag ‘n oomblik van stilte gehandhaaf by ‘n rugbywedstryd waar Karlu moes uitdraf.
Gebed is vir Jurie en Junique, die gesin se pappa en dogter, wat ook in die ongeluk betrokke was, gevra.
“MET INNIGE SIMPATIE. Vandag is dit ‘n baie swaar en hartseer dag vir ons Gallie Gemeenskap. Dis met leedwese en ontsaglike hartseer wat ons julle moet meedeel dat een van ons Gallies, Karlu van Aswegen in gr. 3, gisteraand in ‘n ernstige motorongeluk oorlede is. Karlu was ‘n pragtige seun met die mooiste hart, ons harte is stukkend. Ons dra sy ouers, Jurie & Karin, sy sussie, familie en vriende in ons gebede in hierdie moeilike tyd.”
“Vanoggend moet ons nog hartseer met ons Gallie Gemeenskap deel . Karlu se Mamma, Karin, is ook gisteraand oorlede. Ons harte gaan uit aan Pappa Jurie & Sussie Junique, die Van Aswegen- en Prinsloo-families en vriende. Julle is in ons gebede in hierdie ongelooflike moeilike tyd. Karin was welbekend in Gallieland, altyd ‘n vriendelike groet & ‘n glimlag op jou gesig gehad. Dankie vir die verskil wat jy gemaak het. Rus sag .”
