WES-KAAP. – ‘n Naakte man het Woensdag omstreeks 13:00 omstanders en polisiebeamptes in Keeromstraat, Kaapstad, laat bontstaan. Polisiebeamptes van Kaapstad-Sentraal-polisiekantoor is oor ‘n naakte man op ‘n sypaadjie ontbied.
Volgens lt.kol. Malcolm Pojie het die polisie met aankoms ’n jong man, sonder ‘n draad klere aangetref wat geweier het om saam te werk of homself toe te maak. “’n Skermutseling het ontstaan waartydens die man die vuurwapen van ‘n polisielid gegryp en skote geskiet het. Niemand is egter raakgeskiet nie.”
Polisiebeamptes het die man oorweldig en hom op aanklagte van die roof van ’n vuurwapen, die afvuur van ’n vuurwapen in ’n openbare ruimte en openbare onsedelikheid in hegtenis geneem .
Hy sal in die Kaapstad-landdroshof verskyn sodra hy aangekla is.
