‘n Duitse astrobioloog, dr. Dirk Schulze-Makuch van die Tegniese Universiteit Berlyn, beweer Nasa kon moontlik onwetend lewe – of aliens – op Mars vernietig het. Volgens hom het die Vikings wat in 1976 op die planeet geland het, moontlik mikrobes verdrink deur water en voedingstowwe by droë Marsgrond te voeg.
Hy verduidelik: “Stel jou voor ‘n ruimtetuig vind jou halfdood in die woestyn en gooi jou in die oseaan om jou te red. Dit sou nie werk nie.” Wetenskaplikes het sedertdien besef dat mikrobes op Mars waarskynlik aangepas is om sonder water te oorleef.
Hoewel die Viking-missies positiewe tekens van lewe soos gechloreerde organiese verbindings gevind het, is dit destyds as besmetting afgemaak. Schulze-Makuch glo nou ‘n nuwe missie, met beter begrip van Mars se droë omstandighede, is nodig om definitief te bepaal of daar lewe is.
Bronne: Daily Star, Popular Mechanics, Science Alert
