NOORD-KAAP. – Onogu Nwaemeka, Kelecho Oken, Ebot Kennedy, Chijioke Steven, Charles Aknaji, Umemba Sophuru, Amajoyi Tochukwu, en Charles Okerie Onyedikashi is in die Kimberley-landdroshof borg geweier.
Die agttal het gedurende April die polisiestasie en sy lede aangeval. Hulle word van opsetlike saakbeskadiging, inmeging met die gereg, aanranding en openbare geweld beskuldig.
Die hofsaak is tot 18 Julie uitgestel en die verdagtes sal deur middel van die gebruik van Audio-Visual Remand System (AVR), in die hof verskyn. Dit beteken hulle sal by korrektiewe dienste in aanhouding wees, maar met video-verbinding in die hof aangehoor word.
Nuusflits het voorheen soos volg berig:
Onogu Nwaemeka, Kelecho Oken, Ebot Kennedy, Chijioke Steven, Charles Aknaji, Umemba Sophuru, Amajoyi Tochukwu en Charles Okerie Onyedikashi is aangekla nadat hulle Donderdagaand soos voorheen berig, die Kimberley-polisiestasie en -lede aangeval het.
Mojalefa Senokoatsane, woordvoerder vir die NVG in die provinsie, sê die agt verdagtes is Nigeriese burgers. Die verdagtes het op aanklagte van opsetlike saakbeskadiging, aanranding en openbare geweld in die Kimberley-distrikshof verskyn.
Na bewering het die polisie ‘n Nigeriese verdagte vir die besit van dwelms in hegtenis geneem. Die verdagtes het kapsie teen die inhegtenisneming gemaak. Hulle het toe die aanval geloods, waarna bykomende polisieversterkings ontbied en die arrestasies gemaak is.
Die hofsaak is tot 26 April uitgestel terwyl die ondersoek voortduur en die verdagtes in aanhouding bly.
