GAUTENG. – Die polisie het nog twee manlike verdagtes, onderskeidelik 30 en 26 jaar oud, in hegtenis geneem in verband met die moord op Isaac Satlat (23), ’n e-taxibestuurder, wat op 11 Februarie in die Proklamasieheuwel-gebied in Pretoria vermoor is. Hulle sluit by ‘n verdagte (25) aan wat reeds vroeër vasgetrek is. Al drie sal na verwagting vandag (Maandag) in die Pretoria-landdroshof op aanklagte van motorkaping en moord voorkom. ’n Vierde verdagte word steeds gesoek.
Polisiewoordvoerder, kol. Mavela Masondo, sê die verdagtes sal op aanklagte van motorkaping en moord in die hof verskyn. Die ondersoek dui daarop dat ’n man en ’n vrou glo die rit in Pretoria-Wes aangevra het voordat die bestuurder aangeval en sy voertuig gekaap is. Die gekaapte motor en die bestuurder se liggaam is later dieselfde dag in Atteridgeville gevind. ’n Vroulike verdagte is aanvanklik in hegtenis geneem en het reeds in die hof voorgekom. Verdere inhegtenisnemings word nie uitgesluit nie, aangesien die ondersoek voortduur.
Lumka Mahanjana, NVG-woordvoerder, sê die verdagtes staan tereg op aanklagte van moord met voorbedagte rade en roof met verswarende omstandighede. Volgens die klagstaat is Satlat opsetlik en wederregtelik doodgemaak. Die staat voer aan dat die beskuldigdes met ’n gemeenskaplike doel opgetree het. Op die tweede aanklag van roof met verswarende omstandighede word beweer dat die beskuldigdes die slagoffer se selfoon en ’n Suzuki Ertiga (registrasienommer MS59 NLG GP) met geweld afgeneem het. ’n Vuurwapen of ’n voorwerp wat soos ’n vuurwapen gelyk het, is glo in die voorval gebruik.
Die beskuldigdes is geïdentifiseer, maar name sal eers ná die eerste hofverskyning geplaas word.
