GAUTENG. – ‘n Vierde verdagte het homself Maandag by die Atteridgeville-polisiekantoor in verband met die moord op ’n e-taxibestuurder in Pretoria oorgegee.
Volgens polisiewoordvoerder, kol. Mavela Masondo, sal die verdagte vandag (Dinsdag) op aanklagte van motorkaping en moord in die Pretoria-landdroshof verskyn. Hy sluit aan by drie ander beskuldigdes wat reeds vroeër in hegtenis geneem is. Die e-taxibestuurder is op 11 Februarie in Proklamasieheuwel, in Pretoria-Wes, vermoor nadat hy ’n ritversoek aanvaar het. Sy gekaapte voertuig en liggaam is later dieselfde dag in Atteridgeville gekry. ’n Vroulike verdagte is op 13 Februarie aangekeer. Twee mans is daarna ook in hegtenis geneem.
Al die beskuldigdes staan tereg op aanklagte van motorkaping en moord. Die polisie-ondersoek duur voort.
