KWAZULU-NATAL. – Nog twee gesoekte moord- en-roofverdagtes is vanmiddag deur die polisie in Thembeni in KwaDukuza doodgeskiet.
Kol. Robert Netshiunda sê die polisie, wat na die verdagtes op soek was, het hulle verlede week net-net misgeloop. Inligting is intussen ingesamel en opgevolg, waarna die polisie die verdagtes langs die Link-Thembeni-pad opgemerk het. Daar is aangedui die verdagte voertuig moet stilhou. Twee verdagtes het uit die voertuig gespring en op die polisiebeamptes begin skiet, wat op hulle beurt teruggeskiet het.
Netshiunda sê die twee verdagtes is noodlottig gewond.
“’Die 41-jarige vroulike bestuurder van die verdagte voertuig is ongedeerd, maar is in hegtenis geneem.”
‘n Ondersoek is steeds op die misdaadtoneel aan die gang. ‘n Vuurwapen is in die verdagtes se besit gevind. Nog ‘n vuurwapen en ‘n onbekende bedrag geld is in die verdagte voertuig gevind. Voorlopige ondersoek dui aan die voertuig waarin die verdagtes gery het, behoort aan ‘n polisiebeampte.
“Tot dusver is geen verband tussen die beampte en die oorlede verdagtes gevind nie. Die oorledenes is tot dusver met vier moordsake, een poging tot moordsaak en een huisroof verbind.”
‘n Ondersoek na meer verdagtes wat vermoedelik deel van ‘n sindikaat is, duur voort.
“’n Polisiebeampte is deur ’n koeëlvaste baadjie gered toe hy drie keer in die bors geskiet is. Hy sal vir berading deur die werknemergesondheid- en welstandprogramme (EHW) geneem word.”
Foto: SAPD
