GAUTENG. – Mnr. Mahlaba, ‘n wiskunde-onderwyser van Hoërskool Bophelong in Vanderbijlpark, is Donderdag op die skoolperseel langs sy motor dood aangetref.
Steve Mabona, woordvoerder vir onderwys in die provinsie, sê die onderwyser het Donderdagoggend vir werk aangemeld. Hy het glo verby die hoof se kantoor gestap en hom gegroet. Met die personeelvergadering was hy nie teenwoordig nie. ‘n Personeellid het sy liggaam aangetref waar dit langs sy voertuig gelê het.
Nooddienste is ontbied en die onderwyser is dood verklaar. Die polisie ondersoek die voorval.
Sielkundige ondersteuning is aan die personeel en leerders wat deur die insident geraak word, verskaf.
Die LUR, Matome Chiloane, het medelye met die skoolgemeenskap en die oorledene se familie uitgespreek.
