VRYSTAAT. – ‘n Onderwyseres en ‘n gr. 8-leerder het Maandag kort voor die 8ste periode by HTS Welkom in ‘n fisiese konfrontasie oor ‘n selfoon betrokke geraak. Beide het tydens die insident op die vloer beland.
GRAPHIC CONTENT | The Free State Education Department has condemned any form of violence in classrooms following altercation between a teacher and a grade 8 learner at HTS Welkom on Monday. https://t.co/PEr8aOxt6d
— SABC News (@SABCNews) September 5, 2024
Howard Ndaba, woordvoerder van die Vrystaatse onderwysdepartement, het in ‘n verklaring gesê die voorval het plaasgevind nadat die onderwyseres die leerder gevra het om sy selfoon af te skakel, wat die leerder geweier het. Die onderwyseres het toe probeer om die selfoon te konfiskeer, waarna ‘n fisiese stoeiery tussen die twee ontstaan het. Die gewelddadige voorval is deur ander leerders in die klas gade geslaan en word nou ondersoek. Soos deur die departement beskryf, is die gewelddadige bakleiery op beeld vasgevang, wat intussen soos ‘n veldbrand op sosiale media versprei het.
“Klaskamers is daar vir onderrig en leer en enige vorm van geweld, veral in die teenwoordigheid van ander leerders, word ten sterkste veroordeel,” het Ndaba gesê.
Dr. MJ Maboya, die LUR vir die departement in die provinsie, het sy kommer oor die insident uitgespreek en gesê:
“Dit is diep kommerwekkend, dit moet nie net afgekeur word nie, maar dit moet in die sterkste moontlike terme veroordeel word. Ons neem hierdie saak ernstig op. Die veiligheid van almal op die perseel van skole bly ons hoogste prioriteit. Sulke swak dissipline sal nie geduld word nie. Skole is vir ontwikkeling, nie vir enige ander selfvernietigende aktiwiteite nie. As sodanig ondersoek ons die omstandighede rondom hierdie voorval, en ons sal beslis optree om die situasie reg te stel.”
Bronne: SABC News en Vrystaat Onderwysdepartement
