OOS-KAAP. – Baleka Ntutuka (52), ‘n onderwyseres, is Maandagmiddag omsreeks 16:30 in haar huis in Ziphunzana in Lobode in die nek gesteek, waarna sy gesterf het. Vier verdagtes, tussen die ouderdom van 26 en 34 jaar oud, is in hegtenis geneem.
Volgens kapt. Welile Matyolo is ‘n verdagte die volgende oggend vroeg in Canzibe in die Ngqeleni-polisiëringsarea waar hy woon in hegtenis geneem. Hy het glo aluminiumvensters van die slagoffer se woning gesteel en met haar voertuig gevlug. Die voertuig se opsporingstelsel het die polisie na hom gelei.
Matyolo sê nog drie verdagtes is in Mthatha Mandelapark en Qumbu in hegtenis geneem. Hier is die slagoffer se selfoon en gesteelde vensters opgespoor.
Die vier verdagtes het na bewering opknappings aan die huis van die slagoffer gemaak. Hulle sal binnekort op aanklagte van moord en huisroof in die Libode-landdroshof verskyn.
