KWAZULU-NATAL. – Twee onderwyseresse is glo vanoggend (Donderdag) op pad skool toe in Cottonlands deur gewapende verdagtes gekaap.
Reaction Unit South Africa (Rusa) sê in ‘n sosialemediaplasing gewapende verdagtes in ’n silwer Toyota Yaris het die onderwyseresse se wit VW Polo TSI tot stilstand gedwing, hulle gedreig en met albei in die voertuig weggery.
Rusa-beamptes het ‘n soektog na die slagoffers geloods en later verneem dat die vroue in Emona afgelaai is waar hulle deur ’n verbyganger gehelp en na die Tongaat-polisiestasie geneem is.
Enigiemand met relevante inligting word gevra om die polisie of Rusa by 086 1234 333 te bel.
