MPUMALANGA. – Altesaam 10 persone, waarvan agt in ‘n minibustaxi en twee in ‘n bus, het vanoggend omstreeks 01:00 in ‘n ongeluk op die R42 naby Delmas gesterf.
Moeti Mmusi, die woordvoerder van die provinsie se departement van gemeenskapsveiligheid, sekuriteit en skakeling, sê buiten diegene wat gesterf het, het 24 insittendes ernstige beserings opgedoen. Die oorledenes is op die toneel dood verklaar, terwyl die beseerdes na nabygeleë hospitale vervoer is.
Volgens inligting het die minibustaxi met ‘n sleepwa na Emalahleni gereis en die bus was onderweg na Bronkhorstspruit toe die twee voertuie gebots het. Die oorsaak van die ongeluk is onbekend.
Jackie Macie, die LUR vir die departement, het skok oor die gru-ongeluk uitgespreek.
“Dit is hartseer om te sien dat so baie mense hul lewens op die pad verloor. Ons doen ‘n beroep op groter versigtigheid van bestuurders om hierdie tragedies te vermy.”
Macie het medelye teenoor die families van die oorledenes uitgespreek en beterskap vir die beseerdes toegewens.
