MIDRAND, GAUTENG. – ’n Ongeluk Saterdagmiddag omstreeks 17:00 op die N1-Suid naby die Olifantsfontein-afrit het die lewe van twee seuns geëis.
Volgens Emer-G Med se paramedici het hulle met hulle aankoms op die toneel ’n SUV gevind wat na ’n botsing met ’n ander voertuig gerol het. “Tydens die rol van die voertuig is van die insittendes uit die motor geslinger.”
Omstanders het reeds drie kinders na ’n nabygeleë hospitaal gehaas voordat nooddienste op die toneel aangekom het.
’n Seun (17) het kritieke beserings opgedoen nadat hy uit die SUV geslinger is. Hy het op die toneel aan sy beserings beswyk. Nog ’n insittende van die SUV, ’n seun (9), het op die toneel gesterf nadat paramedici niks vir hom kon doen nie.
’n Man en vrou wat ook in die SUV gereis het, het matige beserings opgedoen. Drie insittendes van die ander voertuig is ook nie ernstig beseer nie en is op die toneel gestabiliseer. Alle oorlewendes is na ’n nabygeleë hospitaal geneem.
Die oorsaak van die ongeluk sal deel van ’n polisie-ondersoek vorm.
Bron: Emer-G-Med
