NOORD-KAAP. – Die onafhanklike polisie-ondersoekdirektoraat (Opod) ondersoek die dood van ’n 57-jarige vrou wat Woensdag 3 Desember in ’n aanhoudingsel by die Rosedale-polisiekantoor in Upington dood aangetref is.
Luidens ‘n verklaring van Lizzy Suping, Opod-woordvoerder, is die polisie omstreeks 04:15 deur ’n lid van die gemeenskap ingelig dat ’n persoon op die sypaadjie in Bakenskopstraat lê. Beamptes is na die toneel waar ’n onbekende vrou op die sypaadjie aangetref is. Sy het nie reageer nie en is na die polisiekantoor geneem, waar sy in ’n sel aangehou is. Tydens ’n selinspeksie omstreeks 06:10 dieselfde oggend het die vrou steeds nie gereageer nie. Nooddienste is ontbied en het haar dood verklaar voordat sy na die plaaslike lykshuis geneem is.
Opod is dieselfde oggend kort ná 07:00 van die voorval in kennis gestel. Die vrou het glo uitwendige beserings gehad. Die ondersoek duur voort. ’n Nadoodse ondersoek sal binnekort gedoen word.
