Skolesport is in volle swang. Ouers ry naweke saam om hulle kinders te ondersteun. Wat veronderstel is om net by ondersteuning te bly, kan soms lelik skeefloop. Die meeste ken daardie ouer langs die veld wat net té hard skree of sommer na die skeidsregter stap om te gaan kla.
Hier is nuttige wenke om jou kind te ondersteun en nie hom of haar in die skande te steek met jou gedrag nie:
1. Wees ondersteunend, nie veroordelend nie: Toon entoesiasme en moedig jou kind aan, selfs al presteer hulle nie altyd op hul beste nie.
2. Wees ‘n positiewe toeskouer: Moenie jou kind, medespelers of afrigters afkraak nie. Positiewe aanmoediging dra by tot ‘n gesonde sportomgewing.
3. Respekteer die afrigter se rol: Laat die afrigter die besluite maak. As daar kommer oor die afrigtingstyl is, bespreek dit privaat en nie tydens die wedstryd nie.
4. Moenie die skeidsregter uitjou nie: Onthou dat skeidsregters mense is en foute kan maak. Wees ’n voorbeeld vir jou kind.
5. Moenie in kompetisie met ander ouers tree nie: Vergelykings en kompetisie tussen ouers kan ‘n negatiewe invloed op die kind hê. Fokus eerder op die positiewe ontwikkeling van jou kind.
6. Leer jou kind om respek te toon: Leer jou kind om medespelers, teenstanders en amptenare met respek te hanteer, ongeag die uitkoms van die wedstryd.
7. Sien die wedstryd as ‘n leerervaring: Identifiseer geleenthede vir groei en ontwikkeling, eerder as om net op die uitslag te fokus. Moedig volharding aan, selfs al het hulle verloor.
Die belangrikste is om die wedstrydervaring saam met jou kind te geniet. Hulle leer soveel van die lewe op die sportveld. Moenie dat jou optrede langs die veld hulle leerproses beskadig nie.
Bronne: School Mum, Positive Coaching Alliance, Verywell Family
