MPUMALANGA. – ‘n Pa (41) van Malelane het Maandag in die Nkomazi-landdroshof op aanklag van verkragting van sy drie dogters (6), (10) en (13) voorgekom.
Die saak is vir borgaansoek en verdere ondersoek tot 7 November uitgestel. Die pa bly in aanhouding.
Kol. Donald Mdhluli sê die kinders het die verkragting verduur, totdat die 13-jarige dit met ‘n vriendin by die skool gedeel en dit aan onderwyspersoneel vertel is.
“Nadat die skoolowerhede van die mishandeling verneem het, is die departement van maatskaplike ontwikkeling geaktiveer, wat dit op hulle beurt by die polisie aangemeld het.”
Voorlopige ondersoek is gedoen en die kinders is vir verdere ondersoek na ‘n mediese fasiliteit geneem. Die pa is Saterdag gearresteer. Die seksuele misdade teen die kinders het plaasgevind terwyl die ma geslaap of televisie gekyk het.
Al die kinders, drie meisies en ‘n seun, is uit hul ouerhuis verwyder en in ‘n plek van veiligheid geplaas.
