KWAZULU-NATAL. – ‘n Paartjie (34) is in Shakaskraal in hegtenis geneem nadat William Mputhi (34), ‘n enkelpa, Saterdagaand brutaal in Shakas Head in die teenwoordigheid van sy dogter (6) doodgemaak is.
Reaction Unit South Africa (Rusa) sê in ‘n sosialemediaplasing Mphuthi is omstreeks 18:30 met ‘n sekel in sy oprit doodgesteek. Hy is later by ’n kliniek in Tongaat dood verklaar. Die verdagtes het ná die voorval met hulle dogter (3) van die toneel gevlug. Volgens Rusa is hulle ook met die sekel wat steeds bloed gedrup het, van die toneel af weg.
Maandagoggend het Mputhi se skoonma Rusa gekontak oor vrese dat die verdagtes sou vlug. Nadat ‘n aantal leidrade van verskeie plekke, waaronder Johannesburg, Richardsbaai en Pietermaritzburg, opgevolg is, het reaksiebeamptes die paartjie by ’n huis in Shakas Head vasgetrek.
Agt Rusa-beamptes het die perseel omring. Die vroulike verdagte, met haar kind by haar, is ná waarneming aangekeer. Haar man is kort daarna onder ’n stapel klere gevind en nadat hy aanvanklik weerstand gebied het, in hegtenis geneem.
Die paartjie word by Umhlali-polisiekantoor op ‘n aanklag van moord aangehou.
