KAAPSTAD – Die parlement het bevestig dat die MK-party vir speaker Thoko Didiza in kennis gestel het van sy besluit om 15 van sy lede uit die Nasionale Vergadering te verwyder. Die ontslag van die lede kom net twee maande nadat hulle in die Parlement ingesweer is.
Die MK-party het Didiza per e-pos ingelig oor die vervanging van sekere lede, nadat hulle volgens die wet die party se nasionale kandidatelys uitgeput het. Dit maak plek vir die voormalige Eskom- en Transnet-base, Brian Molefe en Lucky Montana, om as LP’s ingesweer te word.
Parlementêre woordvoerder, Moloto Mothapo, sê die e-posse is deur die party se hoofsweep, Sihle Ngubane, ingedien. Hierdie veranderinge volg nadat kommer deur die parlement uitgespreek is oor die wettigheid van die kandidatelys.
Mothapo het bevestig dat die speaker tans die korrespondensie oorweeg en dat ‘n besluit binnekort geneem sal word.
