Mark Elliot (59), wat laasweek met Kongokoors gediagnoseer is, word steeds in die Mangaliso Sobukwe-hospitaal in kwarantyn gehou.
Elliot het tydens hul vakansie op Mosselbaai ’n bosluis op hom gevind. Hy het Maandag teruggekeer werk toe en het dieselfde dag baie sleg begin voel, waarna hy dokter toe is.
“Doen alles wat hulle kan”
Lulu Mxebezo, woordvoerder van die Departement van Gesondheid, het aan FiND iT bevestig dat Elliot steeds in kwarantyn gehou word en dat hy eers geskuif of ontslaan kan word wanneer sy toestand verbeter. “Die mediese personeel doen alles wat hulle moontlik kan vir Mark.”
Geen ander gevalle van Kongokoors nie
“Geen ander pasiënte met Kongokoors is sover gerapporteer of in die hospitaal opgeneem nie,” sê Mxebezo.
FiND iT het ook vir Sharon, Mark se vrou, probeer kontak, maar sy was nie beskikbaar vir kommentaar nie.
