VRYSTAAT. – Keabetswe Moroane (43) is deur die Bloemfontein-streekhof aan strafbare manslag skuldig bevind ná die dood van haar buurvrou se agtjarige seun, wat op 12 November 2022 deur haar pitbull verskeur is. Olebogeng Mosime was ‘n leerling aan Laerskool Roseview toe hy op die betrokke Saterdag in Vista Park in Bloemfontein deur die bure se pitbull aangeval en gedood is.
Mojalefa Senokoatsane, NVG-woordvoerder, sê in ‘n verklaring Moroane het drie honde besit. Een was die pitbull wat na bewering vir aggressiewe gedrag bekend was en reeds voorheen inwoners in die omgewing geterroriseer het. Ten spyte van herhaalde klagtes en pogings deur Moroane en haar bure om die hond te keer, insluitend die oprig van heinings en houtpale, het sy versuim om voldoende strukture in stand te hou om die dier behoorlik in te perk.
Op die betrokke dag van die voorval het die pitbull weens dié versuim uit haar erf ontsnap en die kind aangeval waar hy in die motorhuis van ‘n naburige eiendom gespeel het. Die seun is vanweë ernstige beserings op die toneel dood. Die hof het bevind dat Moroane nalatig opgetree het deur nie redelike stappe te neem om voorsienbare skade te voorkom nie. Gegewe die bekende geskiedenis van aggressie deur die hond en vorige klagtes van lede van die gemeenskap, het die hof beslis dat Moroane ‘n plig gehad het om ander teen die potensiële gevaar te beskerm. Haar versuim om beslissend en verantwoordelik op te tree, het direk tot die kind se dood gelei.
Moroane is deur die hof skuldig bevind en die saak is vir vonnisoplegging tot 2 September uitgestel. Die skuldigbevinding is deur die NVG verwelkom. Die ondersoek- en vervolgingspanne is vir hulle werk geprys.
Lees meer hier onder:
