MPUMALANGA. – ‘n Man is Dinsdag omstreeks 13:30 deur drie gewapende verdagtes in sy motorhuis op ‘n plaas in Hazyview oorval en aangerand.
Brig. Donald Mdhluli sê aan Nuusflits die klaer het in die motorhuis gewerk toe drie vermomde verdagtes glo skielik te voorskyn gekom het. Na bewering was twee van die verdagtes in besit van pistole en die klaer is daarmee aangehou.
Die klaer se hond is geskiet en ‘n struweling het tussen die klaer en een van die verdagtes ontstaan en skote is geskiet. Die klaer is voorts glo met ‘n ysterpyp oor die kop geslaan en ook met die kolf van ‘n vuurwapen aangerand.
Niemand is tydens die insident raakgeskiet nie. Die verdagtes het onverrigter sake met leë hande van die toneel gevlug.
Mdhluli versoek enigiemand met relevante inligting om na vore te kom om die verdagtes in die poging tot moordsaak aan te keer.
