WES-KAAP. – Polisielede in die Tuinroete het die langnaweek vir die inhegtenisneming van 70 verdagtes gesorg.
Sers. Christopher Spies sê verskeie tipes operasies is uitgevoer, waartydens verdagtes vir die besit van en handel in dwelms vasgetrek is. Daar is op tik, Mandrax en dagga beslag gelê. Meer as 30 van die verdagtes is op Conville, George en Pacaltsdorp in hegtenis geneem.
Donderdag is daar op die Oudtshoorn-taxistaanplek toegeslaan waar tik en Mandrax gekonfiskeer en twee verdagtes vir handel in dwelms toegesluit is.
Saterdag het lede op ‘n huis in Concordia op Knysna toegeslaan waar meer tik gekonfiskeer is en ‘n ongedokumenteerde persoon vir handel in dwelms toegesluit is.
Twee verdagtes is ook vir die verkoop van drank sonder ‘n dranklisensie in The Crags, buite Plettenberg en Da Gamaskop op Mosselbaai vasgetrek. Altesaam 326 liters drank is gekonfiskeer.
Die verdagtes sal in verskeie landdroshowe voorkom.
“Hierdie arrestasies en beslagleggings vorm deel van verskeie operasies wat van stapel gestuur is om gemeenskappe te beskerm met ‘n spesifieke doel om geslagsgebaseerde geweld en vrouemoord wat verskeie gemeenskappe in hierdie streek teister, hok te slaan.”
