VRYSTAAT. – Die polisie op Reddersburg doen ’n beroep op die publiek om te help met die opsporing van die ma van ’n pasgebore baba wat Woensdag in ’n plastieksak gevind is.
Sers. Sinah Mpakane sê die gru-ontdekking is kort voor 11:00 gemaak toe ’n werker by ’n padinstandhoudingsprojek langs die N6 buite Reddersburg op die sak afgekom het. Volgens haar het die man die sak oopgemaak en die baba daarin gevind, waarna hy die polisie ontbied het. Nooddienste is na die toneel ontbied en het die baba dood verklaar. Die liggaam is daarna na ’n lykshuis geneem.
’n Geregtelike doodsondersoek is intussen geopen. Die polisie vra enigiemand met inligting om na vore te kom.
