OOS-KAAP – Lwambeso Dyantyi (28) word in verband met moord en poging tot moord, wat gedurende 2023 in Zwelitsha plaasgevind het, deur die polisie gesoek. Hy het glo sy neef en ‘n buurman doodgeskiet.
Polisiewoordvoerder, lt.kol. Siphokazi Mawisa, sê die provinsiale eenheid vir ernstige en gewelddadige misdaadondersoeke is op soek na Dyantyi. Hy word verbind aan ’n skietvoorval in Sone 1 op 27 Julie 2023. Daar word beweer dat hy sy neef en ’n buurman doodgeskiet het, terwyl nog ’n persoon tydens die voorval gewond is.
Volgens die polisie het die verdagte ná die voorval uit die omgewing verdwyn en kon hy ondanks volgehoue soektogte nie opgespoor word nie. ’n Lasbrief is vir sy inhegtenisneming bekom.
Die polisie versoek enigiemand met relevante inligting oor waar Dyantyi hom bevind om speur.konst. Omphemetse Moepeng by 060 594 1699 te bel.
