KWAZULU-NATAL. – Die polisie ondersoek vier aanklagte van moord nadat vier mense Saterdag doodgebrand in twee voertuie in die Umatata-gebied in Inanda aangetref is.
Kol. Robert Netshiunda, polisiewoordvoerder, sê beamptes het op ‘n klagte van twee uitgebrande voertuie gereageer. Met aankoms op die toneel is ‘n onherkenbare verbrande liggaam in ‘n Nissan NP200 gevind. Drie ander liggame, ook volledig verbrand, is in ’n Toyota Rumion aangetref. Naby die NP200 is drie beeskarkasse gevind.
Netshiunda sê die motief vir die brandmoorde is nog onbekend, maar daar word vermoed dat die voorval moontlik met veediefstal verband hou. Die proses om die slagoffers te identifiseer, is aan die gang en die soektog na die verdagtes duur voort.
